ଆନ୍ଦୋଳନରୁ ହଟିବାକୁ କୃଷକ ନାରାଜ, ଆସନ୍ତା ୧୮ ତାରିଖରେ ସାରା ଦେଶରେ ରେଳ ରୋକ୍ କରିବେ ଚାଷୀ

ନୂଆଦିଲ୍ଲୀ, ୧୧|୦୨ : ସଂସଦରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କୃଷକଙ୍କୁ ଆନ୍ଦୋଳନ ଶେଷ କରିବାକୁ କହିଥିଲେ ।କିନ୍ତୁ କୃଷକ ସଙ୍ଗଠନ ଆନ୍ଦୋଳନକୁ ଆହୁରି ତୀବ୍ରତର କରିବାକୁ ଯୋଜନା କରିଛନ୍ତି । ସଂଯୁକ୍ତ କିଶାନ ମୋର୍ଚ୍ଚା ଫେବ୍ରୁଆରୀ ୧୮ରେ ସାରା ଦେଶରେ ୪ ଘଣ୍ଟା ପାଇଁ ରେଳରୋକ କରିବ ବୋଲି ଘୋଷଣା କରିଛି ।

କୃଷକ ନେତା ଦର୍ଶନ ପାଲ୍ କହିଛନ୍ତି ଯେ, ବୁଧବାର ଅନୁଷ୍ଠିତ ବୈଠକ ପରେ ରେଳ ରୋକ ବାବଦରେ ନିଷ୍ପତ୍ତି ନିଆଯାଇଛି । ଫେବ୍ରୁଆରୀ ୧୨ ତାରିଖରେ ରାଜସ୍ଥାନର ସମସ୍ତ ଟୋଲ୍ ପ୍ଲାଜାରେ ଆନ୍ଦୋଳନ ହେବ । ଟୋଲ ପ୍ଲାଜାକୁ ଟୋଲ୍ ମୁକ୍ତ କରାଯିବ । ଏହାପରେ ଫେବ୍ରୁଆରୀ ୧୪ ତାରିଖରେ ପୁଲଓ୍ୱାମାରେ ସହିଦ ଯବାନଙ୍କ ସ୍ମରଣରେ ସାରା ଦେଶରେ କ୍ୟାଣ୍ଡେଲ ଶୋଭାଯାତ୍ରା ହେବ ।

ଏତତ୍ ବ୍ୟତୀତ ୧୮ ତାରିଖରେ ସାରା ଦେଶରେ ରେଳରୋକ୍ କରାଯିବ । ଦିନ ୧୨ଟାରୁ ଅପରାହ୍ମ ୪ଟା ଯାଏଁ ରେଳ ରୋକ କାର୍ଯ୍ୟକ୍ରମ କରାଯିବ ।

ସୂଚନାଯୋଗ୍ୟ, ବୁଧବାର ପ୍ରଧାନମନ୍ତ୍ରୀ ସଂସଦରେ କହିଥିଲେ ଯେ, ଭାରତ ଏକ ବଡ ଦେଶ । କୌଣସି ନିଷ୍ପତ୍ତି ନିଆଗଲେ ତାକୁ ସମସ୍ତେ ସ୍ୱୀକାର କରିବେ ବୋଲି ସେମିତି ମାନେ ନାହିଁ । ଦେଶ ବିବିଧତାରେ ପରିପୂର୍ଣ୍ଣ । କୌଣସି ସ୍ଥାନରେ ବହୁତ ଲାଭ ହୁଏ ଓ କେଉଁଠି କମ୍ ଲାଭ ହୋଇଥାଏ ।

କୃଷକ ଆନ୍ଦୋଳନକୁ ନେଇ ପ୍ରଧାନମନ୍ତ୍ରୀ କହିଛନ୍ତି ଯେ, ସେ ଆନ୍ଦୋଳନକୁ ପବିତ୍ର ମାନିଥାନ୍ତି । କିନ୍ତୁ ଏବେ ଆନ୍ଦୋଳନକାରୀ ଏହାର ପବିତ୍ରତା ନଷ୍ଟ କରୁଛନ୍ତି । ଦେଶକୁ ସେମାନେ ଭ୍ରମରେ ପକାଉଛନ୍ତି । ଦେଶ ଏପରି ଆନ୍ଦୋଳନକାରୀଙ୍କୁ ଚିହ୍ନିବା ଆବଶ୍ୟକ ବୋଲି ସେ କହିଥିଲେ ।

from Prameya News7 https://ift.tt/3rIuyYs