ଗାଡି ଚୋରି ତା ଉପରେ ଦାଦାଗିରି ! ଚୋରି ଗାଡିକୁ ଫେରାଇବାକୁ ଡିଲ୍, ଉଦ୍ଧାର ପରେ ଥାନାର ଦ୍ୱାରସ୍ଥ ହେଲେ ମାଲିକ

ବରଗଡ଼ ୧୨।୦୯: ଚୋରି ଗାଡି ଉଦ୍ଧାର । ଗାଡି ଚୋରିରେ ଜଣେ ସୋସିଆଲ ମିଡିଆ ଓ ଜଣେ ଖବର କାଗଜର ସାମ୍ବାଦିକଙ୍କ ସମ୍ପୃକ୍ତି ଥିବା ନେଇ ବରଗଡ଼ ଥାନାରେ ଲିଖିତ ଅଭିଯୋଗ ହୋଇଛି । ଏହି ଘଟଣା ଏବେ ବରଗଡ଼ ସହରରେ ଚର୍ଚ୍ଚାର ବିଷୟ ହୋଇଛି ।

ବରଗଡ଼ ପୌରାଞ୍ଚଳର ଶିବାନନ୍ଦ ନଗର ସ୍ଥିତ ମହାରାଜା କଲୋନୀରେ ରହୁଥିବା ପ୍ରମୋଦ ମହାନ୍ତି ସବୁଦିନ ପରି ଗତ ୯ ତାରିଖ ରାତିରେ ତାଙ୍କ ଚାରି ଚକିଆ ଯାନକୁ ଘର ନିକଟରେ ରଖିଥିଲେ । ମାତ୍ର ୧୦ ତାରିଖ ସକାଳୁ ଗାଡିଟି ସେଠାରେ ନଥିବାରୁ ବରଗଡ଼ ଟାଉନ ଥାନାରେ ଗାଡି ଚୋରି ନେଇ ଲିଖିତ ଅଭିଯୋଗ କରିଥିଲେ । ତେବେ ଅପରାହ୍ନରେ ତାଙ୍କ ଡ୍ରାଇଭରଙ୍କ ପାଖକୁ ସମୀର ଅଗ୍ରୱାଲ ନାମକ ଜଣେ ବ୍ୟକ୍ତି ଫୋନକରି ଗାଡିଟିର ଠିକଣା ସମ୍ପର୍କରେ ଜାଣିବାକୁ ରାଜ୍ ଶର୍ମା ସହ କଥା ହେବାକୁ କହିଥିଲେ । ପରେ ଲିଟୁ ରାଜ୍ ଶର୍ମା ସହ ଫୋନରେ କଥା ହେବାରୁ ସେ ୪୦ ହଜାର ଟଙ୍କା ଦେଲେ ଗାଡିର ଅବସ୍ଥିତି ଜଣେଇବେ ବୋଲି କହିଥିଲେ । ପରେ ୧୦ ହଜାର ଟଙ୍କାରେ କଥା ଛିଣ୍ଡିବାରୁ ଗାଡିଟି ବ୍ରହ୍ମଚାରୀରେ ଥିବା ରାଜ୍ ଶର୍ମା କହିଥିଲେ ।

ସନ୍ଧ୍ୟାରେ କାଦୁଅରେ ଫସି ରହିଥିବା ଗାଡିକୁ ବ୍ରହ୍ମଚାରୀରୁ ଉଦ୍ଧାର କରାଯାଇଥିଲା । ତେବେ ଗାଡି ଉଦ୍ଧାର ହେବା  ପରେ ଫୋନରେ ଗାଡିର ଠିକଣା କହିବା ଲାଗି ଅର୍ଥ ଦାବି କରିଥିବା ବ୍ୟକ୍ତିଙ୍କ ବିରୋଧରେ ଆଉ ଏକ ଅଭିଯୋଗ କରିଛନ୍ତି । ତେବେ ଫୋନ କଲ ଓ ଅଡିଓ ରେକର୍ଡକୁ ଭିତ୍ତି କରି ଗାଡି ଚୋରିରେ କେଉଁ ମାନଙ୍କ ସମ୍ପୃକ୍ତି ରହିଛି ସେ ନେଇ ବରଗଡ଼ ଟାଉନ ପୋଲିସ  ଏକ ଚୋରି ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ରାଜ ଶର୍ମାକୁ ଅଟକ ରଖି ପଚରା ଉଚରା ଜାରି ରଖିଛି ବରଗଡ଼ ଟାଉନ ପୋଲିସ ।

from Prameya News7 https://ift.tt/3mgLd39