ପ୍ରଶାସନର ଅନୁମତି ମିଳିଲାନି, ସ୍ଥଗିତ ରହିଲା ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିରୋଧୀ ପଦଯାତ୍ରା : ଆଜି ପୁରୀ ଯାଉଛନ୍ତି ସାଂସଦ ଅପରାଜିତା ଷଡଙ୍ଗୀ Kanak News

କନକ ବ୍ୟୁରୋ : ପୁରୀ ଐତିହ୍ୟ କରିଡରକୁ ନେଇ ପ୍ରକଳ୍ପ ବିରୋଧରେ ହେବାକୁ ଥିବା ଆଜିର ପଦଯାତ୍ରାକୁ ଜିଲ୍ଲା ପ୍ରଶାସନ ଅନୁମତି ଦେବାକୁ ବାରଣ କରିଦେଇଛି । ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେବା ଆଶଙ୍କାରେ ଅନୁମତି ଦେବାକୁ ମନା କରାଯାଇଛି । ସେପଟେ ସାଂସଦ ଅପରାଜିତା ଷଡଙ୍ଗୀ ଆଜି ପୁରୀ ଯାଉଛନ୍ତି । ସେ ଶ୍ରୀମନ୍ଦିର ଯାଇ ଜଗନ୍ନାଥଙ୍କୁ ଦର୍ଶନ କରିବେ । ପ୍ରକଳ୍ପ ବିରୋଧୀ ଆନ୍ଦୋଳନକୁ ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀଙ୍କ ସମର୍ଥନ ରହିଆସିଥିବା ଚର୍ଚ୍ଚା ହେଉଛି ।

ପଦଯାତ୍ରା ସ୍ଥଗିତ ରହିଥିବା ନେଇ ଖବର ପରେ ଟ୍ୱିଟ କରିଛନ୍ତି ଅପରାଜିତା । ପୂର୍ବାହ୍ନରେ ସେ ପୁରୀ ଯାଉଥିବା କଥା ସ୍ପଷ୍ଟ କରିଛନ୍ତି । ତେବେ କେବଳ ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ କରିବା ସହ ଆଶୀର୍ବାଦ ଭିକ୍ଷା କରିବାକୁ ଯାଉଥିବା ସୋସିଆଲ ମିଡିଆରେ ଲେଖିଛନ୍ତି ଅପରାଜିତା । ପୁରୀ ପରିକ୍ରମା ପ୍ରକଳ୍ପକୁ ନେଇ ଆରମ୍ଭରୁ ସରକାରଙ୍କ ଉପରେ ବର୍ଷୁଛନ୍ତି ଅପରାଜିତା । ଏଏସଆଇର ବିନା ଅନୁମତିରେ ରାଜ୍ୟ ସରକାର ବେଆଇନ ଭାବେ ଖନନ ଓ ନିର୍ମାଣ କରାଯାଉଥିବା ଅଭିଯୋଗ କରିଆସୁଛନ୍ତି ।

ଶ୍ରୀମନ୍ଦିର ବଞ୍ଚାଅ ଆନ୍ଦୋଳନର ଆବାହକ ଶ୍ରୀ ମହାପାତ୍ର କହିଛନ୍ତି, ପ୍ରଶାସନକୁ ପଦଯାତ୍ରା ପାଇଁ ଅନୁମତି ମଗାଯାଇଥିଲେ ବି ଅନୁମତି ମିଳିନି । ଏଣୁ ଏହି ପଦଯାତ୍ରାକୁ ଆମେ ସ୍ଥଗିତ ରଖିବାକୁ ନିଷ୍ପତ୍ତି ନେଇଛୁ। ପରବର୍ତ୍ତୀ ସମୟରେ ଏ ଉପରେ ବସି ଆଲୋଚନା ପରେ ଯାଇ ଆଗାମୀ କାର୍ଯ୍ୟପନ୍ଥା ଗ୍ରହଣ କରାଯିବ । ଅତୀତରେ ଯେଉଁ ଦଙ୍ଗା ହୋଇଥିଲା, ସେହି ଆଶଙ୍କା କରି ପ୍ରଶାସନ ଆମକୁ ଅନୁମତି ଦେଇନି । ଏପରିକି ଅନୁମତି ନ ପାଇ ଯଦି କୌଣସି ପଦଯାତ୍ରା ଅବା ଆନ୍ଦୋଳନ ହୁଏ, ତେବେ ଦଙ୍ଗା ସହ ଅନ୍ୟାନ୍ୟ ମାମଲାରେ ଗିରଫ କରିବାକୁ କୁହାଯାଇଛି । ଏଣୁ ଆମେ ଆନ୍ଦୋଳନକୁ ସ୍ଥଗିତ ରଖିବାକୁ ନିଷ୍ପତ୍ତି ନେଲୁ ।

କିନ୍ତୁ ମହାପ୍ରଭୁଙ୍କ ଦର୍ଶନ କରିବା ସମସ୍ତଙ୍କର ଅଧିକାର ରହିଛି ବୋଲି ଶ୍ରୀ ମହାପାତ୍ର କହିଛନ୍ତି। ଅନ୍ୟପଟେ ଶ୍ରୀମନ୍ଦିର ବଞ୍ଚାଅ ଆନ୍ଦୋଳନ ନେତୃତ୍ବରେ ପଦଯାତ୍ରା ହେବ ବୋଲି ଏହାର ଉପଦେଷ୍ଟା ପ୍ରଫୁଲ୍ଲ କୁମାର ସାହୁ କହିଛନ୍ତି । ଶ୍ରୀ ସାହୁ କହିଛନ୍ତି, ଆମେ ପ୍ରଶାସନକୁ ଆଗରୁ ଅନୁମତି ମାଗିଥିଲୁ । ସେ ପୁଣି ୭ ଦିନ ତଳୁ । ଆମେ କୌଣସି ବିଶୃଙ୍ଖଳା କରିବାକୁ ଏହି ପଦଯାତ୍ରାର ଆୟୋଜନ କରିନୁ । ଆମେ ଶାନ୍ତିପୂର୍ଣ୍ଣ ଭାବେ ପଦଯାତ୍ରା କରିବୁ । ଅଧିକ ସଂଖ୍ୟା ନ ହେଲେ ବି ହାତଗଣତି ଭକ୍ତଙ୍କ ଭିତରେ ଏହି ପଦଯାତ୍ରା ହେବ ବୋଲି ଶ୍ରୀ ସାହୁ କହିଛନ୍ତି । କେହି ନ ଆସିଲେ ନିଜେ ଏକୁଟିଆ ପଦଯାତ୍ରା କରିବେ ଓ ଆବଶ୍ୟକ ପଡ଼ିଲେ ସିଂହଦ୍ବାରରେ ଅନଶନରେ ବସିବେ ବୋଲି ଚେତାବନୀ ଦେଇଛନ୍ତି ।

The post ପ୍ରଶାସନର ଅନୁମତି ମିଳିଲାନି, ସ୍ଥଗିତ ରହିଲା ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିରୋଧୀ ପଦଯାତ୍ରା : ଆଜି ପୁରୀ ଯାଉଛନ୍ତି ସାଂସଦ ଅପରାଜିତା ଷଡଙ୍ଗୀ first appeared on Kanak News.

from Kanak News https://ift.tt/bOuHrIB https://ift.tt/5vqTLIw