କନକ ବ୍ୟୁରୋ : ଲୋକପ୍ରିୟ ପୌରାଣିକ ଧାରାବାହିକ ରାମାୟଣରେ ରାବଣ ଚରିତ୍ରରେ ଅଭିନୟ କରିଥିବା ବରିଷ୍ଠ ଅଭିନେତା ଅରବିନ୍ଦ ତ୍ରିବେଦୀଙ୍କ ଦେହାନ୍ତ ହୋଇଛି । ମଙ୍ଗଳବାର ବିଳମ୍ବିତ ରାତିରେ ହୃଦଘାତ ଯୋଗୁଁ ମୃତ୍ୟୁ ହୋଇଥିବା ଅରବିନ୍ଦଙ୍କ ଭଣଜା କୌସ୍ତୁଭ ସୂଚନା ଦେଇଛନ୍ତି । ମୃତ୍ୟୁ ବେଳକୁ ତାଙ୍କୁ ୮୨ବର୍ଷ ହୋଇଥିଲା । ଦୀର୍ଘ ଦିନ ହେବ ଅରବିନ୍ଦ ଅସୁସ୍ଥ ରହି ଆସୁଥିଲେ । ଅରବିନ୍ଦ ନିଜର ୪୦ବର୍ଷର ଅଭିନୟ କ୍ୟାରିୟରେ ସେ ୩୦୦ରୁ ଉର୍ଦ୍ଧ ସିନେମା ଓ ଧାରବାହିକରେ ଅଭିନୟ କରିଥିଲେ । ରାମାୟଣ ବ୍ୟତୀତ ବିକ୍ରମ ବେତାଳ ଓ ଅନ୍ୟାନ୍ୟ ପୌରାଣିକ ଏବଂ ସାମାଜିକ ଧାରବାହିକରେ ତାଙ୍କର ଚମକ୍ରାର ଅଭିନୟ ଦେଖିବାକୁ ମିଳିଥିଲା ।
ମଧ୍ୟପ୍ରଦେଶରେ ଜନ୍ମଗ୍ରହଣ କରଥିବା ଅରବିନ୍ଦ ଗୁଜରାଟୀ ରଙ୍ଗମଂଚରୁ ଅଭିନୟ ଆରମ୍ଭ କରିଥିଲେ । ଛୋଟ ପରଦାରେ ପ୍ରାୟ ୪୦ବର୍ଷ ଧରି ନିଜର ଯୋଗଦାନ ଦେଇଥିବା ଏହି ବରିଷ୍ଠ କଳାକାରଙ୍କୁ ଅନେକ ପୁରସ୍କାରରେ ସମ୍ମାନିତ କରାଯାଇଛି । ୩୦୦ରୁ ଅଧିକ ବହୁଭାଷୀ ସିନେମା ଓ ସିରିୟଲରେ ଅରବିନ୍ଦ ଅଭିନୟ କରି ଦର୍ଶକଙ୍କ ମନରେ ସ୍ୱତନ୍ତ୍ର ସ୍ଥାନ କରିଥିଲେ । ୧୯୯୧ ଓ ୧୯୯୬ ମସିହା ପର୍ଯ୍ୟନ୍ତ ରାଜନୀତିରେ ସେ ସକ୍ରିୟ ରହିଥିଲେ । ସେ ଗୁଜରାଟର ସାବରକାଣ୍ଠା ନିର୍ବାଚନ ମଣ୍ଡଳୀ ପାଇଁ ମନୋନୀତ ହୋଇଥିଲେ । ଏହାଛଡ଼ା, ବିଜୟ ଆନନ୍ଦ ଇସ୍ତଫା ଦେବା ପରେ ସେ ‘ସେନ୍ସର୍ ବୋର୍ଡ ଫର୍ ସାର୍ଟିଫିକେସନ୍’ ର କାର୍ଯ୍ୟନିର୍ବାହୀ ସଭାପତି ଭାବେ ଦାୟିତ୍ୱ ନିର୍ବାହ କରିଥିଲେ । ବରିଷ୍ଠ ଅଭିନେତାଙ୍କ ଦେହାନ୍ତରେ କଳାଜଗତରେ ଶୋକର ଛାୟା ଖେଳିଛି ।
The post ଚାଲିଗଲେ ‘ରାମାୟଣର ରାବଣ’ : ୮୨ ବର୍ଷ ବୟସରେ ଅଭିନେତା ଅରବିନ୍ଦ ତ୍ରିବେଦୀଙ୍କ ପରଲୋକ first appeared on Kanak News.
from Kanak News https://ift.tt/3DdAZsa https://ift.tt/3uIQLs1
No comments: