ରାଜଧାନୀରେ ଲମ୍ବା ତ୍ରିରଙ୍ଗା ! ସ୍ମାର୍ଟ ସିଟିରେ ପ୍ରଦର୍ଶିତ ହେବ ୧୭ କି.ମି. ଲମ୍ବର ଜାତୀୟ ପତାକା Kanak News

ପବିତ୍ର ସ୍ବାଧୀନତା ଦିବସ ଅବସରରେ ସ୍ମାର୍ଟ ସିଟିରେ ପ୍ରଦର୍ଶିତ ହେବ ୧୭ କି.ମି. ଜାତୀୟ ପତାକା। ହନୁମାନ ବାଟିକା ଛକରୁ ଛେଣ୍ଡ ଡିଏଭି, ସେକ୍ଟର-୧୪ ଡିପିଏସ୍ ସ୍କୁଲ ରିଂ ରୋଡ ଦେଇ ସେକ୍ଟର-୨ ବିଜୁ ପଟ୍ଟନାୟକ ଛକ ଯିବ। ସେଠାରୁ ପୁଣି ହନୁମାନବାଟିକା ପର୍ଯ୍ୟନ୍ତ ଆସିବ। ମାନବ ଶୃଙ୍ଖଳ ଜରିଆରେ ଜାତୀୟ ପତାକାକୁ ପ୍ରଦର୍ଶିତ କରାଯିବ। ପୂର୍ବାହ୍ନ ପ୍ରାୟ ସାଢ଼େ ୯ଟାରୁ ଏହି ନିଆରା କାର‌୍ୟ୍ୟକ୍ରମ ଆରମ୍ଭ ହେବ। ବିଭିନ୍ନ ସ୍କୁଲ କଲେଜ ଛାତ୍ରଛାତ୍ରୀ, ସ୍ବେଚ୍ଛାସେବୀ ଅନୁଷ୍ଠାନଙ୍କ ସହ ସହରର ମୋଟ ପ୍ରାୟ ୪୦ ହଜାର ଲୋକ ସାମିଲ ହେବ। ଗ୍ରୀନିଜ୍ ଓ ଲିମକା ବୁକ୍ ଅଫ୍ ରେକର୍ଡରେ ସାମିଲ ହେବା ପାଇଁ ଏଭଳି ନିଆରା କାର‌୍ୟ୍ୟକ୍ରମ ହାତକୁ ନେଇଛନ୍ତି ସ୍ମାଇଲ୍ ଫର୍ ଏଭର ଫାଉଣ୍ଡେସନ।

ପୁଲୱାମାରେ ସହିଦ ସ୍ବର୍ଗତ ଅଜିତ ସାହୁଙ୍କ ପିତା ସନ୍ତୋଷ ସାହୁ ଜାତୀୟ ପତାକା ଉତ୍ତୋଳନ କରି କାର‌୍ୟ୍ୟକ୍ରମର ଶୁଭାରମ୍ଭ କରିବେ। ଜାତୀୟ ପତାକାକୁ ଧରି ଛିଡା ହୋଇଥିବା ପ୍ରାୟ ୪୦ ହଜାର ଜନସାଧାରଣ ଏକକାଳୀନ ଜାତୀୟ ସଙ୍ଗୀତ ଗାନ କରିବେ। ଏତଦ୍ବ୍ୟତୀତ ଓଡ଼ିଶାର ଲୋକନୃ୍ତ୍ୟ, ଭାରତୀୟ ଶାସ୍ତ୍ରୀୟ ନୃତ୍ୟ ସହ ଦେଶ ଓ ରାଜ୍ୟର ବିଭିନ୍ନ ଲୋକ କଳାର ପ୍ରଜ୍ଞାପନ ମେଢ଼ ମଧ୍ୟ ପ୍ରଦର୍ଶିତ ହେବ। ଉଲ୍ଲେଖଯୋଗ୍ୟ, ଗତ ପ୍ରାୟ ୩ ମାସ ଧରି ୧୨ ଜଣ କାରୀଗର ଜାତୀୟ ପତାକା ତିଆରି କାମ ଲାଗିଥିଲେ। ଏଥିରେ ପ୍ରାୟ ୪୫ ହଜାର ମିଟର କପଡା ବ୍ୟବହୃ୍ତ ହୋଇଛି। ଏ ବାବଦରେ ପ୍ରାୟ ୧୭ ଲକ୍ଷ ଟଙ୍କା ଖର୍ଚ୍ଚ ହୋଇଛି ବୋଲି ଆୟୋଜକ ସଂସ୍ଥା ପକ୍ଷରୁ କୁହାଯାଇଛି।

from Kanak News https://ift.tt/2yWMS6R https://ift.tt/2ORBYtB