ବନ୍ଧୁତା କରି ପୋଲିସ୍ ଚାକିରୀ ପାଇଁ ୭ ଲକ୍ଷ ଠକି ନେଲା ଠକ, ଗିରଫ କରି କୋର୍ଟ ଚାଲାଣ କଲା ପୋଲିସ୍‌

ବାଲିପାଟଣା, ୩୦ ।୯: ପୋଲିସ୍ ଚାକିରୀ କରାଇ ଦେବାକୁ କହି ୭ ଲକ୍ଷ ଠକେଇ । ଅଭିଯୋଗ ପରେ ବାଲିପାଟଣା ପୋଲିସ୍ ଢେଙ୍କାନାଳରୁ ଠକ ଯୁବକକୁ ଗିରଫ କରି କୋର୍ଟ ଚାଲାଣ କରିଛି ।

ସୂଚନା ଅନୁଯାୟୀ ବାଲିପାଟଣା ଥାନା ବରଦାପଡ଼ା ଗ୍ରାମର ସୌରଭ ରଂଜନ ବେହେରା ସ୍ନାତକ ପରେ ଚାକିରୀ ଆଶାୟୀ ଥିଲେ । କିଛି ଦିନ ପୂର୍ବେ ଢେଙ୍କାନାଳ ଚନ୍ଦ୍ରଶେଖରପ୍ରସାଦ ଗ୍ରାମର ନିରଂଜନ ଖଟୁଆଙ୍କ ସହ ଉତ୍ତରା ଛକରେ ଥିବା ଏକ ଜିମରେ ଦେଖା ହୋଇଥିଲା । ସମ୍ପର୍କ ବଢିବା ପରେ ନିରଂଜନ ଜଣେ ବରିଷ୍ଠ ପୋଲିସ୍ କର୍ମଚାରୀଙ୍କ ପୁତ୍ର ବୋଲି ପରିଚୟ ଦେଇ ପୋଲିସ୍ ଚାକିରୀର ଲୋଭ ଦେଖାଇଥିଲା । ଏଥିପାଇଁ ୭ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି କହିଥିଲା ନିରଂଜନ । ଗତ ଜାନୁୟାରୀ ମାସରୁ ତିନୋଟି କିସ୍ତିରେ ୭ ଲକ୍ଷ ନେଇଥିଲା ଅଭିଯୁକ୍ତ । ମାସକ ମଧ୍ୟରେ ଚାକିରି କରାଇ ଦେବାକୁ ପ୍ରତିସୃତି ଦେଇ ପରେ ଧରା ଛୁଆଁ ଦେଇ ନ ଥିଲା ନିରଂଜନ । ସୌରଭ ଏ ନେଇ ବାଲିପାଟଣା ଥାନାରେ ଲିଖିତ ଅଭିଯୋଗ ପରେ ଅଭିଯୁକ୍ତ ନିରଂଜନକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ୍ ।

from Prameya News7 https://ift.tt/3oqk01A