ସାମ୍ନାକୁ ଆସିଲା ଦାଦନର ଦୟନୀୟ ଚିତ୍ର । ନୂଆପଡ଼ାରୁ ନାଗପୁରୁ ଦାଦନ ଖଟୁଥିବା ବେଳେ ହେଲେ ସାଥୀ ଶ୍ରମିକଙ୍କ ଆକ୍ରମଣର ଶିକାର । କାଟିଦେଲେ ଗୋଡ଼ର ପାଂଚ ଆଙ୍ଗୁଠି Kanak News

କନକ ବ୍ୟୁରୋ: ପୁଣିଥରେ ନୂଆପଡାରୁ ଆସିଛି ଦାଦନର ଦୟନୀୟ ଚିତ୍ର । ଏଥର ଦାଦନ ଖଟିବାକୁ ଯାଇ ସାଥୀ ଶ୍ରମିକଙ୍କ ଆକ୍ରୋଶର ଶୀକାର ହୋଇଛନ୍ତି ନୂଆପଡାର ଜଣେ ବୟସ୍କ ଦାଦନ ଶ୍ରମିକ । ନୂଆପଡାର ଚମରୁ ପହରିଆ ଗତ ଜୁଲାଇ ମାସରେ ନାଗପୁରକୁ ଦାଦନ ଖଟିବାକୁ ଯାଇଥିବା ବେଳେ ସାଥୀ ଶ୍ରମିକଙ୍କ ଦ୍ୱାରା ମରଣାନ୍ତକ ଆକ୍ରମଣର ଶୀକାର ହୋଇଛନ୍ତି । ଜୁଲାଇ ମାସରେ କୋମନା ଅଂଚଳର ଦୁଇଜଣ ବ୍ୟକ୍ତି ଡୋଲା ଓ ବିଦେଶୀଙ୍କ ଚକ୍ରାନ୍ତରେ ପଡି ଦାଦନ ସର୍ଦ୍ଦାର ଜାଲରେ ଫଶିଯାଇଥିଲେ ଚମରୁ । ଭଲ ରୋଜଗାରର ପ୍ରତିଶ୍ରୁତି ସହ ଦାଦନ ସର୍ଦ୍ଦାର ଚମରୁଙ୍କ ସହ ତାଙ୍କ ଦୁଇ ସହଯୋଗୀଙ୍କୁ ନାଗପୁର ପଠାଇଥିଲା ।

ସେପଟେ ଦାଦନ ସର୍ଦ୍ଦାର କିଛି ଅଗ୍ରୀମ ଟଙ୍କା ଦେଇଥିବା ବେଳେ ତାକୁ ଆତ୍ମସାତ କରିଦେଇଥିଲେ ଚମରୁଙ୍କ ଦୁଇ ସାଥୀ । ନାଗପୁରରେ ନିର୍ମାଣ ଶ୍ରମିକ ଭାବେ କାମ କରୁଥିବା ବେଳେ ଦୁଇ ସହଯୋଗୀଙ୍କ ସହ ଚମରୁଙ୍କ ବଚସା ହୋଇଥିଲା । ଏହାସହ ଚମରୁଙ୍କ ଦୁଇ ସହଯୋଗୀ ଡୋଲା ଓ ବିଦେଶୀ ଚମରୁଙ୍କ ଗୋଡର ଆଙ୍ଗୁଠିକୁ କାଟି ପକାଇଥିଲେ । ଚେତାଶୂନ୍ୟ ଅବସ୍ଥାରେ ଚମରୁ ନାଗପୁର ରେଳ ଷ୍ଟେସନରୁ ଉଦ୍ଧାର ହେବା ପରେ ତାଙ୍କୁ ସ୍ଥାନୀୟ ମେଡିକାଲରେ ଚିକିତ୍ସା କରାଗଲା । ହେଲେ କେହି ସମ୍ପର୍କୀୟ ନଆସିବାରୁ ଅସହାୟ ଭାବେ ପୁଣି ତାଙ୍କୁ ଛାଡି ଦିଆଗଲା ।

ଏହାପରେ କୌଣସିମତେ ଚମରୁ ଆସି ନାଗପୁର ରେଳ ଷ୍ଟେସନରେ ପହଁଚିବା ସହ ଓଡିଶା ଫେରି ଆସିଲେ । ଏହାପରେ ନାଗପୁରରେ ଦାଦନ ଶ୍ରମିକଙ୍କ ସହ ହୋଇଥିବା ଅତ୍ୟାଚାରର ପୁରା ଚିତ୍ର ସାମ୍ନାକୁ ଆସିଛି ।  ଏହି ପୁରା ଘଟଣାରେ କେମିତି ଅଭିଯୁକ୍ତଙ୍କୁ ଧରିବା ସହ ଦାଦନ ସର୍ଦ୍ଦାର ଉପରେ କାର୍ଯ୍ୟାନୁଷ୍ଠାନ ହେବ ତାଉପରେ ବି ନଜର ରହିଛି ।

from Kanak News https://ift.tt/2IrsArk https://ift.tt/2Mfoa7X