ଆଜି ସ୍ଥଳଭାଗରେ ମାଡ ହେବ ବାତ୍ୟା : ସନ୍ଧ୍ୟାରେ କଳିଙ୍ଗପାଟ୍ଟନମରେ ଗୁଲାବ ଲ୍ୟାଣ୍ଡଫଲ୍ ସମ୍ଭାବନା Kanak News

କନକ ବ୍ୟୁରୋ : ରବିବାର ସଂଧ୍ୟାରେ ଲ୍ୟାଣ୍ଡଫଲ କରିବ ବାତ୍ୟା ଗୁଲାବ । ଏହାର ପ୍ରଭାବରେ ଗଜପତି, ଗଞ୍ଜାମ ଜିଲ୍ଲାରେ ଝିପଝିପ ବର୍ଷା ଆରମ୍ଭ ହୋଇଛି । ବଙ୍ଗୋପସାଗରରେ କେନ୍ଦ୍ରୀଭୂତ ହୋଇଥିବା ଗଭୀର ଅବପାତ ଏବେ ବାତ୍ୟାର ରୂପ ନେଇଛି । ସମୁଦ୍ର ଭିତରେ ବାତ୍ୟା ଏବେ ଘଂଟା ପ୍ରତି ୭କିଲୋମିଟର ବେଗରେ ଉତରପଶ୍ଚିମ ଦିଗରେ ଗତି କରୁଛି । ଏହା ଗୋପାଳପୁରଠାରୁ ୩୧୦ କିଲୋମିଟର ଦକ୍ଷିଣ-ପୂର୍ବ ଦିଗରେ ଓ ଆନ୍ଧ୍ରର କଳିଙ୍ଗପଟ୍ଟନମଠାରୁ ୪୪୦ କିଲୋମିଟର ଦୂର ପୂର୍ବରେ ରହିିଛି ।

ଆଜି ସଂଧ୍ୟାରେ ଗୋପାଳପୁର ଓ ଆନ୍ଧ୍ରର କଳିଙ୍ଗପଟ୍ଟନମ ନିକଟରେ ସ୍ଥଳଭାଗ ଅତିକ୍ରମ କରିପାରେ । ତେବେ ବାତ୍ୟା ପ୍ରଭାବରେ ପ୍ରବଳ ବର୍ଷା ହେବାକୁ ଥିବା ବେଳେ ପବନର ବେଗ କମ ରହିବ ବୋଲି ଆକଳନ କରିଛି ପାଣିପାଗ ବିଭାଗ । ବାତ୍ୟା ଗୁଲାବ ସ୍ଥଳ ଭାଗ ଛୁଇଁବା ବେଳକୁ ପବନର ବେଗ ଘଂଟା ପ୍ରତି ୭୫ରୁ ୮୫ କିଲୋମିଟର ରହିବ । ସମୟ ସମୟରେ ଘଂଟା ପ୍ରତି ୯୫ କିଲୋମିଟର ବେଗରେ ପବନର ଝଟକା ଅନୁଭୂତ ହେବ ବୋଲି କହିଛି ପାଣିପାଗ ବିଭାଗ । ବାତ୍ୟାର ପ୍ରଭାବରେ ବଡ଼ ପବନ ହୋଇନପାରେ, ହେଲେ ରବିବାର ଦିନ ୭ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବା ଆଶଙ୍କା କରାଯାଉଛି । ଦକ୍ଷିଣ ଓଡ଼ିଶା ଓ ଉତର ଆନ୍ଧ୍ରକୁ ଅରେଂଜ ୱାର୍ଣ୍ଣିଂ ଜାରି କରାଯାଇଛି ।

ପୁରୀ ଓ ଗୋପାଳପୁରରେ ବନ୍ଦରରେ ୪ ନମ୍ବର ବିପଦ ସଂକେତ ଜାରି କରାଯାଇଛି । ପାରାଦ୍ୱୀପ ଓ ଧାମରା ପାଇଁ ୩ ନମ୍ବର ବିପଦ ସଂକେତ ଦିଆଯାଇଛି । ମୋଟ ୧୧ ଜିଲ୍ଲାରେ ବାତ୍ୟାର ପ୍ରଭାବ ପଡିପାରେ । କଚ୍ଚା ଘର, ରାସ୍ତା ଘାଟ କ୍ଷତିଗ୍ରସ୍ତ ହେବାର ଆଶଙ୍କା କରାଯାଉଛି । ବିଦ୍ୟୁତ ସରବରାହ ଉପରେ ପଡିପାରେ ପ୍ରଭାବ । ଏବଂ ପ୍ରବଳ ବର୍ଷା ଯୋଗୁଁ ତଳିଆ ଅଂଚଳରେ ଫ୍ଲାସ ଫ୍ଲଡ ହେବାର ସମ୍ଭାବନା ରହିଛି । ଋଷିକୂଲ୍ୟା, ନାଗାବଳି, ବାଂଶଧାରା, ମହାନଦୀର ତଳିଆ ଅଂଚଳରେ ଜଳସ୍ତର ବୃଦ୍ଧି ହେବାର ସମ୍ଭାବନା ରହିଛି । ଗଜପତି ଓ ଗଂଜାମ ଜିଲ୍ଲାର କିଛି ଅଂଚଳରେ ଭୂସ୍ଖଳନ ହେବାର ଆଶଙ୍କା ମଧ୍ୟ ରହିଛି ।

The post ଆଜି ସ୍ଥଳଭାଗରେ ମାଡ ହେବ ବାତ୍ୟା : ସନ୍ଧ୍ୟାରେ କଳିଙ୍ଗପାଟ୍ଟନମରେ ଗୁଲାବ ଲ୍ୟାଣ୍ଡଫଲ୍ ସମ୍ଭାବନା first appeared on Kanak News.

from Kanak News https://ift.tt/3o9lhKy https://ift.tt/2WcvV7w