ପିଭି ସିନ୍ଧୁଙ୍କୁ ଐତିହାସିକ ସ୍ୱର୍ଣ୍ଣ ପଦକ : ବ୍ୟାଡମିଣ୍ଟନ ୱାଲର୍ଡ ଚାମ୍ପିଅନସିପ ଟାଇଟଲ ଜିଣିବାରେ ପ୍ରଥମ ଭାରତୀୟ Kanak News

କନକ ବ୍ୟୁରୋ : ଇତିହାସ ରଚିଲେ ପି.ଭି. ସିନ୍ଧୁ । ଅଲିମ୍ପିକ୍ସର ରୌପ୍ୟ ପଦକ ବିଜେତା ସିନ୍ଧୁ ଆଜି ବିଶ୍ୱ ବ୍ୟାଡମିଂଟନ ଚାମ୍ପିଆନସିପରେ ସ୍ୱର୍ଣ୍ଣ ପଦକ ଜିତି ନୂଆ ରେକର୍ଡ କରିଛନ୍ତି । ପ୍ରଥମ ଭାରତୀୟ ଭାବେ ସିନ୍ଧୁ ଏହି ମେଡାଲ ଅର୍ଜନ ଜିତିଛନ୍ତି । ଏହା ପୂର୍ବରୁ ବିଶ୍ୱ ବ୍ୟାଡମିଂଟନ ଚାମ୍ପିଆନସିପର ଉଭୟ ପୁରୁଷ ଓ ମହିଳା ବର୍ଗର କୌଣସି ଭାରତୀୟ ସ୍ୱର୍ଣ୍ଣ ପଦକ ଜିତି ନଥିଲେ । ସୁଇଜରଲାଣ୍ଡରେ ଖେଳାଯାଇଥିବା ବିଶ୍ୱ ବ୍ୟାଡମିଂଟନ ଚାମ୍ପିଆନସିପ୍ ଫାଇନାଲ ମ୍ୟାଚରେ ବିଶ୍ୱର ଚତୁର୍ଥ ସ୍ଥାନରେ ଥିବା ଖେଳାଳି ଜାପାନର ଓକୁହାରାଙ୍କୁ ହରାଇ ଏହି ରେକର୍ଡ ହାସଲ କରିଛନ୍ତି ସିନ୍ଧୁ । ବିଶ୍ୱ ର‌୍ୟାକିଂର ପଂଚମ ସ୍ଥାନରେ ଥିବା ସିନ୍ଧୁ, ଓକୁହାରାଙ୍କୁ ସିଧାସଳଖ ୨୧-୭, ୨୧-୭ ଗେମରେ ହରାଇ ଦେଇଛନ୍ତି । ଏହି ମୁକାବିଲା ୩୭ ମିନଟ୍ ପର୍ଯ୍ୟନ୍ତ ଚାଲିଥିଲା ।

 ସିନ୍ଧୁଙ୍କ ଏହି ସ୍ବର୍ଣ୍ଣିମ ସଫଳତା ପାଇଁ ସାରା ଦେଶରୁ ତାଙ୍କୁ ଅଭିନନ୍ଦନର ସୁଅ ଛୁଟିଛି । ଏହା ମଧ୍ୟ ବିଶ୍ବ ଚାମ୍ପିଅନସିପରେ ସିନ୍ଧୁଙ୍କ ମୋଟ ପଞ୍ଚମ ପଦକ । ଯେଉଁଥିରେ ରବିବାରର ସ୍ବର୍ଣ୍ଣ ବ୍ୟତୀତ ୨ ଲେଖାଏଁ ରୌପ୍ୟ ଓ କାଂସ୍ୟ ସାମିଲ ରହିଛି । ଜଣେ ମହିଳା ଭାବେ ବିଶ୍ବ ଚାମ୍ପିଅନ୍‌ସିପ୍‌ରେ ୫ ପଦକ ହାତେଇବାରେ  ସେ ପୂର୍ବତନ ଅଲିମ୍ପିକ୍‌ ଓ ବିଶ୍ବ ବିଜୟିନୀ ଚୀନ୍‌ର ଝାଙ୍ଗ୍‌ ନିଙ୍ଗ୍‌ଙ୍କ ସମକକ୍ଷ ହୋଇଛନ୍ତି । ୫ ପଦକ ଜିତିବାରେ ବିଶ୍ବର ଦ୍ବିତୀୟ ମହିଳା ଖେଳାଳି ହୋଇଥିବା‌ ସିନ୍ଧୁ ମଧ୍ୟ ତିନିଟିଯାକ ରଙ୍ଗର ପଦକ (ସ୍ବର୍ଣ୍ଣ, ରୌପ୍ୟ ଓ କାଂସ୍ୟ) ହାସଲ କରିବାରେ ତୃ୍ତୀୟ ଖେଳାଳି ହୋଇଛନ୍ତି । ବିଶ୍ବ ଚାମ୍ପିଅନ୍‌ସିପ୍‌ରେ ମୋଟ ୫ ପଦକ ବ୍ୟତୀତ ୨୦୧୬ ରିଓ ଅଲିମ୍ପିକ୍ସରେ ରୌପ୍ୟ, ଗୋଲ୍‌ଡ କୋଷ୍ଟ ରାଜ୍ୟଗୋଷ୍ଠୀ କ୍ରୀଡ଼ାରେ ରୌପ୍ୟ, ଜାକର୍ତା ଏସୀୟ କ୍ରୀଡ଼ାରେ ରୌପ୍ୟ ଏବଂ ଗତବର୍ଷ ବିଡବ୍ଲୁଏଫ୍‌ ବିଶ୍ବ ଟୁର୍‌ ଫାଇନାଲ୍‌ସରେ ରୌପ୍ୟ ପଦକ ସିନ୍ଧୁଙ୍କ ସଫଳତାର ଆଉ ଗୋଟିଏ ଗୋଟିଏ ଫର୍ଦ । ଦମଦାର ବିଜୟ ପାଇଁ ସିନ୍ଧୁଙ୍କୁ ଟୁଇଟ୍ କରି ଶୁଭେଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କ୍ରିକେଟର ସଚିନ ତେନ୍ଦୁଲକର, ଭିଭିଏସ୍‌ ଲକ୍ଷ୍ମଣ, ପ୍ରଜ୍ଞାନ ଓଝା, ହରଭଜନ ସିଂହ, ଅଭିନେତା ଅନୁପମ ଖେର ପ୍ରମୁଖ ମଧ୍ୟ ଏହି ସଫଳତା ଲାଗି ସିନ୍ଧୁଙ୍କୁ ଟ୍ବିଟ୍‌ କରି ଶୁଭେଚ୍ଛା ଜଣାଇଛନ୍ତି । ସିନ୍ଧୁଙ୍କ ବିଜୟ ପରେ ତାଙ୍କ ପରିବାରରେ ଖୁସିର ମାହୋଲ ଖେଳିଯାଇଛି ।

from Kanak News https://ift.tt/340Xn79 https://ift.tt/2U36IXH