ମଣିପୁରରେ ସାନି ହିଂସା : ସୁରକ୍ଷାକର୍ମୀଙ୍କ ଉପରେ ଗୁଳି ଚଳାଇଲେ ଉପଦ୍ରବକାରୀ; ଲୁଟିନେଲେ ୪ ହଜାର ଅସ୍ତ୍ରଶସ୍ତ୍ର Kanak News

କନକ ବ୍ୟୁରୋ : ମଣିପୁରରେ ସାନି ହିଂସା । ସୁରକ୍ଷାକର୍ମୀଙ୍କ ଉପରେ ଗୁଳି ଚଳାଇଲେ ଉପଦ୍ରବକାରୀ । ଲୁଟିନେଲେ ୪ ହଜାର ଅସ୍ତ୍ରଶସ୍ତ୍ର । ୫ ଲକ୍ଷ ରାଉଣ୍ଡ ଗୁଳିଗୋଳା ମଧ୍ୟ ଲୁଟ୍ ହୋଇଥିବା ସୂଚନା । ସଂଖ୍ୟାଗରିଷ୍ଠ ବର୍ଗର ଲୋକଙ୍କ ସହିତ ମିଶି ଦୁର୍ବୃତ୍ତମାନେ ଅସ୍ତ୍ରାଗାରରେ ପଶି ଏକେ ଓ ଘଟକ ସିରିଜ୍ ଆସଲ୍ଟ ରାଇଫଲ ସମେତ ୧୯ ହଜାରରୁ ଅଧିକ ଗୁଳି ଲୁଟି ନେଇଛନ୍ତି ।

ବିଷ୍ଣୁପୁର ଜିଲ୍ଲା ନରଣସେଇନାଠାରେ ଥିବା ଦ୍ବିତୀୟ ଇଣ୍ଡିଆ ରିଜର୍ଭ ବାଟାଲିୟନର ମୁଖ୍ୟାଳୟରେ ଏହି ଘଟଣା ଘଟିଛି । ଗତ ମାସ ୩ ତାରିଖରେ ରାଜ୍ୟରେ ଘଟିଥିବା ଜାତିଆଣ ସଂଘର୍ଷରେ ପ୍ରାଣ ହରାଇଥିବା ଲୋକଙ୍କ ସାମୂହିକ ଶବ ଦାହ କରିବାକୁ ଆଦିବାସୀମାନେ ଚୁରାଚାନ୍ଦପୁରଠାରେ ଯୋଜନା କରିଥିଲେ । ଚୁରାଚାନ୍ଦପୁର ଅଭିମୁଖେ ଯିବା ପାଇଁ ଲୋକମାନେ ସେଠାରେ ଭିଡ଼ ଜମିଥିଲା ।

ଅଧିକାରୀଙ୍କ କହିବାନୁଯାୟୀ ଦୁର୍ବୃତ୍ତମାନେ ଗୋଟିଏ ଏକେ ସିରିଜ୍ ଆସଲ୍ଟ ରାଇଫଲ, ୩ଟି ଘଟକ ରାଇଫଲ, ୧୯୫ଟି ସେଲ୍ଫ ଲୋଡିଂ ରାଇଫଲ, ୫ଟି ଏମପି-୫ ବନ୍ଧୁକ, ୧୬ଟି ୯ଏମ୍ଏମ୍ ପିସ୍ତଲ, ୨୫ଟି ବୁଲେଟପ୍ରୁଫ୍ ଜ୍ୟାକେଟ୍, ୨୧ଟି କାର୍ବାଇନ୍, ୧୨୪ଟି ହ୍ୟାଣ୍ଡ ଗ୍ରେନେଡ୍ ଆଦି ଲୁଟି ନେଇଛନ୍ତି । ଆଦିବାସୀମାନେ ଗଣ ଶବ ସଂସ୍କାର କାର୍ଯ୍ୟକ୍ରମ ରଖିବା ଦ୍ବାରା ମଣିପୁରରେ ପୁଣିଥରେ ଉତ୍ତେଜନା ଦେଖାଦେଇଛି ।

ବିଷ୍ଣୁପୁର ଜିଲ୍ଲାର କାଙ୍ଗୱାଇ ଓ ଫୁଗାକଚାଓ ଅଞ୍ଚଳରେ ଆଦିବାସୀମାନେ କଟକଣାକୁ ଉଲ୍ଲଂଘନ କରି ପ୍ରସ୍ତାବିତ ଶବଦାହ ସ୍ଥଳକୁ ଯାଉଥିବାବେଳେ ଶୋଭାଯାତ୍ରାକୁ ଅଟକାଇବା ପାଇଁ ଗୁରୁବାର ସେନା ଓ ଆରଏଏଫ ଯବାନମାନେ ଲୁହବୁହା ଗ୍ୟାସ୍ ପ୍ରୟୋଗ କରିବାରୁ ୨୫ରୁ ଅଧିକ ଲୋକ ଆହତ ହୋଇଛନ୍ତି । ରାଜଧାନୀରେ ଥିବା ଅନ୍ୟ ଦୁଇଟି ଅସ୍ତ୍ରାଗାରରୁ ସଂଖ୍ୟାଗରିଷ୍ଠ ସମ୍ପ୍ରଦାୟର ‌ଦୁର୍ବୃତ୍ତମାନେ ଲୁଟ୍ କରିବାକୁ ଚେଷ୍ଟା କରିଥିଲେ ମଧ୍ୟ ଏହି ପ୍ରୟାସ ବିଫଳ ହୋଇଥିଲା । ମଣିପୁରରେସଂଘର୍ଷ ଆରମ୍ଭ ହେବା ପରଠାରୁ ୧୬୦ରୁ ଅଧିକ ଲୋକ ପ୍ରାଣ ହରାଇଲେଣି ।

The post ମଣିପୁରରେ ସାନି ହିଂସା : ସୁରକ୍ଷାକର୍ମୀଙ୍କ ଉପରେ ଗୁଳି ଚଳାଇଲେ ଉପଦ୍ରବକାରୀ; ଲୁଟିନେଲେ ୪ ହଜାର ଅସ୍ତ୍ରଶସ୍ତ୍ର first appeared on Kanak News.

from Kanak News https://ift.tt/qnZx4US https://ift.tt/DJRC0kz