Health Tips: ଜିରାର ଚମତ୍କାରିତା; ମୋଟାପା କମାଏ, କୋଲେଷ୍ଟ୍ରଲ ନିୟନ୍ତ୍ରଣ କରେ Pramod Behera

କୁହାଯାଏ ଯେ ରୋଷେଇ ଘର ହେଉଛି ପ୍ରାଥମିକ ଚିକିତ୍ସାଳୟ। ରୋଷେଇ ଘରେ ଥିବା ଅନେକ ସାମଗ୍ରୀକୁ ଯଦି ଠିକ୍ ଭାବେ ବ୍ୟବହାର କରାଯାଏ ତେବେ ଯେ କେହି ଅନେକ ବଡ ବଡ ରୋଗରୁ ମୁକ୍ତି ପାଇପାରେ। ଏପରି ଏକ ସାମଗ୍ରୀ ହେଲା ଜିରା।

ରୋଷେଇ ବେଳେ ଖାଦ୍ୟକୁ ସୁଆଦିଆ କରିବା ପାଇଁ ଜିରା ପ୍ରାୟ ପ୍ରତିଦିନ ବ୍ୟବହୃତ ହେଉଥିବାବେଳେ ଜିରା ମଧ୍ୟ ପେଟରେ ସୃଷ୍ଟି ହେଉଥିବା ବଦହଜମି ଏବଂ ଗ୍ୟାସ୍ ଭଳି ସମସ୍ୟାକୁ ଦୂର କରିବା ପାଇଁ ବହୁ ବ୍ୟବହୃତ ହୁଏ। ଖାଲି ଏତିକି ନୁହେଁ, ଏହା ଅନେକ ଗମ୍ଭୀର ରୋଗକୁ ଦୂରେଇ ରଖିବାରେ ମଧ୍ୟ ସାହାଯ୍ୟ କରିଥାଏ।

ଓଜନ ହ୍ରାସ କରେ:

ଓଜନ ହ୍ରାସ କରିବାରେ ଜିରା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ଯଦି ଆପଣ ଓଜନ ହ୍ରାସ କରିବାକୁ ଚାହାଁନ୍ତି, ତେବେ ଆପଣ ଜିରାକୁ ମଧ୍ୟ ଆପଣଙ୍କ ଖାଦ୍ୟର ଏକ ଅଂଶ କରିପାରିବେ। ଏଥିପାଇଁ ଆପଣ ପ୍ରତିଦିନ ପ୍ରାୟ ତିନି ଗ୍ରାମ ଜିରା ପାଉଡର ଖାଇ ପାରିବେ। ଏକ ଅଧ୍ୟୟନରେ ଦେଖାଯାଇଛି ଯେ, ଅଧିକ ଓଜନ ଥିବା କିଛି ମହିଳା ୩ ମାସ ପର୍ଯ୍ୟନ୍ତ ପ୍ରତିଦିନ ଦହିରେ ୩ ଗ୍ରାମ ଜିରା ପାଉଡର ମିଶାଇ ଖାଇ ସେମାନଙ୍କ ଓଜନ, ଅଣ୍ଟାର ଆକାର ଏବଂ ଶରୀରର ଚର୍ବିର ପରିମାଣ ଯଥେଷ୍ଟ କମେଇ ପାରିଛନ୍ତି।

କୋଲେଷ୍ଟ୍ରଲ ନିୟନ୍ତ୍ରଣ: କୋଲେଷ୍ଟ୍ରଲ ନିୟନ୍ତ୍ରଣ କରିବାରେ ଜିରା ମଧ୍ୟ ବହୁତ ସାହାଯ୍ୟ କରେ। ଅଧ୍ୟୟନରେ ଏହା ମଧ୍ୟ ପ୍ରକାଶ ପାଇଛି ଯେ ତିନି ମାସ ପାଇଁ ୩ ଗ୍ରାମ ଜିରା ପାଉଡର ଖାଇବା ଦ୍ୱାରା ସମୁଦାୟ କୋଲେଷ୍ଟ୍ରଲ୍ର ସ୍ତର ହ୍ରାସ ହେବା ସହିତ ଲୋ-ଡେନ୍‌ସିଟି ଲିପୋପ୍ରୋଟେନ୍ ଅର୍ଥାତ୍ ଖରାପ କୋଲେଷ୍ଟ୍ରୋଲ୍ ଏବଂ ଟ୍ରାଇଗ୍ଲେସିରାଇଡ୍ ମଧ୍ୟ କମିଯାଇଥିଲା।

ମଧୁମେହରେ ପ୍ରଭାବଶାଳୀ:

ଟାଇପ୍-୨ ମଧୁମେହରେ ଜିରା ମଧ୍ୟ ବହୁତ ପ୍ରଭାବଶାଳୀ। ଏଥିପାଇଁ ଆପଣ ଜିରା ତେଲର ସାଜାଯ୍ୟ ନେଇପାରିବେ। ୨୦୧୭ର ଏକ ଅଧ୍ୟୟନରେ ଟାଇପ୍-୨ ଡାଇବେଟିସ୍ ଥିବା ବୟସ୍କମାନଙ୍କ ଉପରେ ଜିରା ତେଲର ପ୍ରଭାବକୁ ପରୀକ୍ଷା କରାଯାଇଥିଲା। ଆଠ ସପ୍ତାହ ପରେ, ସେମାନଙ୍କ ରକ୍ତରେ ଶର୍କରା, ଇନ୍‌ସୁଲିନ୍ ଏବଂ ହେମୋଗ୍ଲୋବିନ୍ A1C ସ୍ତରରେ ଉଲ୍ଲେଖନୀୟ ଉନ୍ନତି ଦେଖିବାକୁ ମିଳିଥିଲା।

ଚାପରୁ ମୁକ୍ତି:

ଜିରା ମଧ୍ୟ ଚାପ ସ୍ତରକୁ ହ୍ରାସ କରିବାରେ ବହୁତ ପ୍ରଭାବଶାଳୀ ବୋଲି ପ୍ରମାଣିତ। ଜିରାକୁ ଆଣ୍ଟି-ଅକ୍ସିଡାଣ୍ଟ ଏବଂ ଭିଟାମିନ୍ C ର ଏକ ଉତ୍ତମ ଉତ୍ସ ଭାବରେ ବିବେଚନା କରାଯାଏ। ଏନେଇ ଜିରା ଖାଇବା ଚାପର ସ୍ତରକୁ ହ୍ରାସ କରିବାରେ ସାହାଯ୍ୟ କରିଥାଏ ଏବଂ ଚିନ୍ତାର ସମସ୍ୟାକୁ ମଧ୍ୟ ହ୍ରାସ କରିଥାଏ।

ତୀକ୍ଷ୍ଣ ସ୍ମୃତିଶକ୍ତି:

ସ୍ମୃତି ଶକ୍ତିକୁ ଶକ୍ତିଶାଳୀ କରିବାରେ ଜିରା ମଧ୍ୟ ବହୁତ ସାହାଯ୍ୟକାରୀ। ଏହାକୁ ଖାଇବା ଦ୍ୱାରା, ସ୍ମୃତିଶକ୍ତି ତୀକ୍ଷ୍ଣ ହୋଇଯାଏ। ଏହାର ପ୍ରଭାବରେ ଜଣଙ୍କୁ ସ୍ମୃତି ଶକ୍ତି ହରାଇବା ଭଳି ସମସ୍ୟାର ସମ୍ମୁଖୀନ ହେବାକୁ ପଡିବ ନାହିଁ। ଏପରି ପରିସ୍ଥିତିରେ, ଯଦି ଜଣେ ନିଜର ସ୍ମୃତିଶକ୍ତିକୁ ଶକ୍ତିଶାଳୀ କରିବାକୁ ଚାହାନ୍ତି, ତେବେ ପ୍ରତିଦିନ ଜିରାକୁ ଖାଦ୍ୟର ଏକ ଅଂଶ ଭାବରେ ବ୍ୟବହାର କରାଯାଇପାରେ।

from Latest Odisha News, Breaking News Today | Top Updates on Corona - OTV News https://ift.tt/e3BKyRU