ବିଦ୍ୟୁତ ସର୍ଟ ସର୍କିଟରୁ ଅଗ୍ନିକାଣ୍ଡ, ଜଳିଗଲା ୫ ବଖରା ଘର

ଭଦ୍ରକ ୩୦।୧୦: ଅଗ୍ନିକାଣ୍ଡରେ ଜଳିଗଲା ୩ଟି ପରିବାରର ୫ ବଖରା ଘର । ଏହାସହ ଅଗ୍ନିକାଣ୍ଡରେ ୪ଟି ଗୋରୁ ସହ ଗୋଟିଏ ଛେଳି ଜୀବନ୍ତ ଦଗ୍ଧ । ଭଦ୍ରକ ଜିଲ୍ଲା ବାଣିତିଆ ପଞ୍ଚାୟତ ଦକ୍ଷିଣସାହୀ ଗାଁରେ ଏଭଳି ଘଟଣା ଘଟିଛି । ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛି ।

ଖବର ଅନୁଯାୟୀ, ଦକ୍ଷିଣସାହି ଗାଁର ଗୋପବନ୍ଧୁ ଜେନାଙ୍କ ପରିବାର ଲୋକେ ଗତରାତିରେ ଖାଇ ସାରି ଶୋଇବାକୁ ଯାଇଥିଲେ । ଶୋଇଥିବା ସମୟରେ ହଠାତ୍‌ ବିଦ୍ୟୁତ ସର୍ଟ ସର୍କିଟ ଘଟି ଗୋପବନ୍ଧୁଙ୍କ ଘରେ ନିଆଁ ଲାଗିଯାଇଥିଲା । ନିଆଁର ପ୍ରକୋପ ଏତେ ଥିଲା ଯେ, ଘରୁ କୌଣସି ଜିନିଷ କାଢିପାରିନଥିଲେ । କେବଳ ଘର ଭିତରେ ଶୋଇଥିବା ସମସ୍ତ ସଦସ୍ୟ ନିଜ ଜୀବନକୁ ବଞ୍ଚାଇ ବାହାରକୁ ପଳାଇଆସିଥିଲେ । ତେବେ ନିଆଁର ଝାସରେ ଗୋପବନ୍ଧୁ ଓ ତାଙ୍କ  ୨ଭାଇଙ୍କର ୫ ବଖରା ଘର ପୋଡି ପାଉଁଶ ହୋଇଯାଇଥିଲେ । ଏହାସହିତ ଗୁହାଳ ଘରେ ନିଆଁ ଲାଗି ୪ଟି ଗୋରୁ ଓ ଗୋଟିଏ ଛେଳିଙ୍କର ଜୀବନ୍ତ ଦଗ୍ଧ ହୋଇଛି । ଅଗ୍ନିଶମ  ବାହିନୀ ଘଟଣାସ୍ଥଳରେ ପହଁଚି ନିଆଁକୁ ଆୟତ୍ତ କରିଥିଲା, ହେଲେ ସେତେବେଳକୁ ୩ଟି ପରିବାର ସମ୍ପୂର୍ଣ୍ଣ ସର୍ବସ୍ୱାନ୍ତ ହୋଇଯାଇଥିଲେ ।

from Prameya News7 https://ift.tt/3GB6vCL