ଆଜି ଦ୍ୱିତୀୟ ଦିନିକିଆ : ସିରିଜ୍ ବିଜୟ ଲକ୍ଷ୍ୟରେ ବିରାଟ ସେନା, ଇଂଲଣ୍ଡ ପାଇଁ ‘କର ବା ମର’ ସ୍ଥିତି

ପୁନେ,୨୬/୦୩: ଶୁକ୍ରବାର ଭାରତ ଓ ଇଂଲଣ୍ଡ ମଧ୍ୟରେ ଖେଳାଯିବ ଦ୍ୱିତୀୟ ଦିନିକିଆ । ପ୍ରଥମ ମ୍ୟାଚରେ ବିଜୟ ଲାଭ କରିବା ପରେ ବିରାଟ କୋହଲିଙ୍କ ଟିମ୍‌ ଇଣ୍ଡିଆର ନଜର ଏବେ ସିରିଜ ଉପରେ ରହିଛି  ।ଶୁକ୍ରବାର ବିଜୟ ସହ ସିରିଜ କବ୍‌ଜା କରିବାକୁ ଭାରତୀୟ ଦଳ ଲକ୍ଷ୍ୟ ରଖିଛି । ଅନ୍ୟ ପଟରେ ଇଂଲଣ୍ଡ ପାଇଁ ଆଜିର ମ୍ୟାଚ୍‌ ‘କର ବା ମର’ ପରିସ୍ଥିତି ସୃଷ୍ଟି କରିଛି । ମ୍ୟାଚ୍ ତୀବ୍ର ସଂଘର୍ଷପୂର୍ଣ୍ଣ ହେବା ନେଇ ଆଶା କରାଯାଉଛି ।

ପ୍ରଥମ ମ୍ୟାଚ୍‌ରେ ଇଂଲଣ୍ଡ ଏକ ବିଜୟ ସୁଯୋଗ ହାତଛଡ଼ା କରିଥିଲା । ଟସ୍‌ ଜିତି ଭାରତକୁ ବ୍ୟାଟିଂ ପାଇଁ ଆମନ୍ତ୍ରଣ କରିବା ସତ୍ତେ୍ୱ ଇଂଲଣ୍ଡ ଜିତିବାରେ ବିଫଳ ହୋଇଥିଲା । ଓପନର ମାନେ ୧୩୫ ରନ୍‌ର ଭାଗିଦାରୀ ଗଠନ କରିବା ପରେ ମଧ୍ୟଭାଗ ବ୍ୟାଟ୍ସମ୍ୟାନମାନେ ବିଫଳ ହେବାରୁ ଇଂଲଣ୍ଡକୁ ପରାଜୟର ସାମ୍ନା କରିବାକୁ ପଡ଼ିଥିଲା । ଶୁକ୍ରବାର ବ୍ୟାଟ୍ସମ୍ୟାନମାନେ ତ୍ରୁଟି ସୁଧାରିଲେ ଇଂଲଣ୍ଡ ବିଜୟ ହାସଲ କରିପାରିବ ।

ଭାତୀୟ ଦଳର ରଣନୀତି ଭିନ୍ନ । ସବୁ ବିଭାଗରେ ଶୃଙ୍ଖଳିତ ପ୍ରଦର୍ଶନ କରି ଧିରେ ଧିରେ ବିଜୟ ନିକଟତର ହେବାର କ୍ଷମତା ଭାରତୀୟ ଦଳ ନିକଟରେ ରହିଛି। ଦଳର ପ୍ରମୁଖ ଖେଳାଳିମାନେ ଫର୍ମରେ ରହିଛନ୍ତି । ପ୍ରଥମ ମ୍ୟାଚ୍‌ରେ ଶିଖର ଧାୱନ, ବିରାଟ କୋହଲି, ଲୋକେଶ ରାହୁଲ ଓ କୃନାଲ୍‌ ପାଣ୍ଡ୍ୟା ଅର୍ଦ୍ଧଶତକ ଅର୍ଜନ କରଥିଲେ । ବୋଲରମାନେ ମଧ୍ୟ ମାପଚୁପ ବୋଲିଂ କରିବାରେ ସଫଳ ହୋଇଥିଲେ ।

ଶୁକ୍ରବାର ଉଭୟ ଦଳରେ ପରିବର୍ତ୍ତନ ହେବା ନିଶ୍ଚିତ। ଶ୍ରେୟାସ ଆୟର ଆହତ ହୋଇଥିବାରୁ ତାଙ୍କ ସ୍ଥାନରେ ରିଶଭ ପନ୍ତ କିମ୍ବା ସୂର୍ଯ୍ୟକୁମାର ଯାଦବଙ୍କ ମଧ୍ୟରୁ ଜଣଙ୍କୁ ସୁଯୋଗ ମିଳିବ । ଟି-ଟ୍ୱେଣ୍ଟିରେ ସୂର୍ଯ୍ୟକୁମାରଙ୍କ ପ୍ରଦର୍ଶନ ଚମତ୍କାର ରହିଥିଲା । ଦିନିକିଆରେ ସେ ସୁଯୋଗର ସଦୁପଯୋଗ କରିବାକୁ ଅପେକ୍ଷା କରିଛନ୍ତି । ପନ୍ତ ମଧ୍ୟ ଫର୍ମରେ ରହିଛନ୍ତି । ସେ ବାମହାତୀ ବ୍ୟାଟ୍ସମ୍ୟାନ୍‌ ହୋଇଥିବାରୁ ଶୁକ୍ରବାର ସୁଯୋଗ ପାଇପାରନ୍ତି । ବୋଲିଂ ବିଭାଗରେ ପରିବର୍ତ୍ତନ ଆଶା କରାଯାଉଛି । କୁଲଦୀପ ଯାଦବଙ୍କ ସ୍ଥାନରେ ୟୁଝବେନ୍ଦ୍ର ଚହଲଙ୍କୁ ସୁଯୋଗ ମିଳିପାରେ ବୋଲି ଚର୍ଚ୍ଚା ହେଉଛି ।

ସମ୍ଭାବ୍ୟ ଭାରତୀୟ ଦଳ: ରୋହିତ ଶର୍ମା,ଶିଖର ଧାୱନ, ବିରାଟ କୋହଲି(ଅଧିନାୟକ), ସୂର୍ଯ୍ୟକୁମାର ଯାଦବ/ରିଶଭ ପନ୍ତ, ଲୋକେଶ ରାହୁଲ, କୃନାଲ ପାଣ୍ଡ୍ୟା, ହାର୍ଦ୍ଦିକ ପାଣ୍ଡ୍ୟା, ଭୁବନେଶ୍ୱର କୁମାର, ସର୍ଦୁଲ ଠାକୁର, ୟୁଝବେନ୍ଦ୍ର ଚହଲ/କୁଲଦୀପ ଯାଦବ,ପ୍ରସିଦ୍ଧ କ୍ରିଷ୍ଣା ।

ସମ୍ଭାବ୍ୟ ଇଂଲଣ୍ଡ ଦଳ: ଜାସନ ରୟ, ଜନି ବେୟାରଷ୍ଟୋ, ବେନ ଷ୍ଟୋକ୍ସ, ଲାଏମ ଲିଭିଙ୍ଗଷ୍ଟୋନ୍‌, ଜୋସ ବଟଲର(ଅଧିନାୟକ), ଦାୱିଦ ମଲାନ, ମୋଇନ ଅଲି, ସାମ କୁରାନ, ଟମ କୁରାନ, ଆଦିଲ ରସିଦ,ମାର୍କ ଉଡ୍‌ ।

from Prameya News7 https://ift.tt/3u0t50N