ଜାଲରେ ପଡିଲା ବିରଳ ‘ମାର୍ଲରିନ୍ ଫିସ୍’, ମୟୂର ଭଳି ରହିଛି ପୁଛ, ଏତେ ଟଙ୍କାରେ ହେଲା ନିଲାମ

ଧାମରା,୨୭/୦୩: ଜାଲରେ ପଡିଲା ବିରାଟ ମାଛ । ଖଣ୍ଡା ଭଳି ମୁହଁ ଏବଂ ମୟୂର ପୁଚ୍ଛଭଳି ପର ଥିବା ବିରଳ ମାଛ ଧାମରା ଧୀବରଙ୍କ ଜାଲରେ  ପଡ଼ିଛି । ଏହି ମାଛ ଘଣ୍ଟାକୁ ୧୨୫ କିଲୋମିଟର ବେଗରେ ଯାଇପାରେ । ଧାମରାର ସୁନା ଟ୍ରଲରରେ ବିରଳ ମାଛ ତିନୋଟି ଧରାପଡ଼ିଛନ୍ତି ।

୮ଫୁଟ୍‌ ଲମ୍ବ ଓ ୨୨ କେଜି ଓଜନର ପୁଚ୍ଛଥିବା ମାଛ ତିନୋଟି ଜଣେ ଧୀବରଙ୍କ ଜାଲରେ ପଡ଼ିଥିଲେ । ସୁନା ଟ୍ରଲରଟି ଏହି ମାଛକୁ ଧରି ଚନ୍ଦିନିପାଳ ମାଛ ଧରା ଜେଟିରେ ପହଞ୍ଚିବା ପରେ ଏହାକୁ ଦେଖିବା ପାଇଁ ଲୋକଙ୍କ ଭିଡ ଲାଗିଥିଲା ।

ଚନ୍ଦିନିପାଳ ମାଛ କଣ୍ଟାରେ ହାୱାଡ଼ାର ଜଣେ ମାଛ ବେପାରୀ ୫୦ ହଜାର ଟଙ୍କାରେ ଏହାକୁ ନିଲାମ ନେଇଥିଲେ । ଏହି ପ୍ରଜାତିର ମାଛ ପ୍ରଶାନ୍ତ ମହାସାଗରେ ଦେଖାଯାଆନ୍ତି । ବିଶେଷତଃ ଥଣ୍ଡା ଜଳବାୟୁ ଥିବା ଗଭୀର ସମୁଦ୍ରରେ ଏହି ମାଛମାନେ ଆତଯାତ ହୁଅନ୍ତି । କ୍ଷୀପ୍ରଗତିରେ ଏହି ମାଛ ସମୁଦ୍ରରେ ପହଁରି ପାରେ ।

ପ୍ରଶାନ୍ତ ମହାସାଗରରୁ କେବଳ ଜଳବାୟୁ ପରିବର୍ତ୍ତନ ପାଇଁ ଭାରତ ମହାସାଗରକୁ ଆସି ଧାମରା ଧୀବରଙ୍କ ଜାଲରେ ଧରା ଦେଇଛନ୍ତି । ଏହି ମାଛକୁ ମାର୍ଲରିନ୍‌ ଫିସ୍‌ ବୋଲି ହାୱାଡ଼ା ମାଛ ବେପାରୀମାନେ ନାମିତ କରିଛନ୍ତି । ୨୦୧୯ ମସିହାରେ ଏହି ପ୍ରଜାତିର ମାଛ ଧାମରା ଅଞ୍ଚଳରେ ଧରାପଡ଼ିଥିଲେ । ଏବେ ୨୦୨୧ରେ ପୁଣି ଧରାପଡ଼ିଛନ୍ତି ।

from Prameya News7 https://ift.tt/3tVRch2