ଧରାପଡ଼ିଲା କୋରାପୁଟ ବିଧାୟକ କୃଷ୍ଣଚନ୍ଦ୍ର ସଗରିଆଙ୍କ ମିଛ : କୁନ୍ଦୁଲି ପିଡୀତା ଖାଲି ବାହାନା, ବିଏସପିରେ ମିଶିବା ପାଇଁ ଦେବେ ଇସ୍ତଫା

କୋରାପୁଟ ୩୧/୧୦ : ଧରାପଡ଼ିଲା କୃଷ୍ଣ ସଗରିଆଙ୍କ ମିଛ । କୁନ୍ଦୁଲି ପୀଡ଼ିତାଙ୍କ ପାଇଁ ସେ ବିଧାୟକ ପଦରୁ ଇସ୍ତଫା ଦେଉନାହାନ୍ତି, ବରଂ ନିଜର ବ୍ୟକ୍ତିଗତ ରାଜନୈତିକ ସ୍ବାର୍ଥ ପାଇଁ ଇସ୍ତଫା ଦେଉଛନ୍ତି । କଂଗ୍ରେସ ଛାଡ଼ି ବହୁଜନ ସମାଜ ପାର୍ଟିରେ ମିଶିବା ପାଇଁ କୃଷ୍ଣ ଏମିତି ଡ୍ରାମା କରୁଛନ୍ତି । ଏପଟେ ପରିବାର ଲୋକ ଏବଂ କୁନ୍ଦୁଲି କମିଶନ ସ୍ବତନ୍ତ୍ର କାଉନସେଲଙ୍କ ଯୁକ୍ତି ମଧ୍ୟ କୃଷ୍ଣ ଡ୍ରାମା କରୁଛନ୍ତି ବୋଲି ପ୍ରମାଣିତ କରିଛି…

ପ୍ରକୃତରେ ବ୍ୟକ୍ତିଗତ ରାଜନୈତିକ ସ୍ବାର୍ଥ ପାଇଁ କୃଷ୍ଣ ସଗରିଆ ହାତ ଛାଡ଼ି ହାତୀ ଧରିବାକୁ ଯାଉଛନ୍ତି । ଦଳିତ ରାଜନୀତି କରିବାକୁ ଯାଇ କୁନ୍ଦୁଲି ପ୍ରସଙ୍ଗକୁ ମୋହରା ବନାଉଛନ୍ତି । କୁନ୍ଦୁଲି ଘଟଣାକୁ ସାହାରା କରି କୋରାପୁଟରେ ବହୁଜନ ସମାଜ ପାର୍ଟିର ମୂଳଦୂଆ ପକାଇବା ଯୋଜନାରେ ଅଛନ୍ତି ସେ । ତେବେ କୃଷ୍ଣ ସଗରିଆ ଆଗରୁ ଭିତିରିଆ ବିଏସପିରେ ଥିଲେ, ଏବେ ସେ କଂଗ୍ରେସ ଛାଡ଼ିଲେ କିଛି ଫରକ୍ ପଡ଼ିବନି ବୋଲି କହିଛନ୍ତି ତାରାପ୍ରସାଦ ବାହିନୀପତି । ସେହିଭଳି କଂଗ୍ରେସ ଉପ ସଭାପତି ଅନନ୍ତ ସେଠୀ, ତାଙ୍କ ନୈତିକତା ଏବଂ ମାନବିକତା ନେଇ ପ୍ରଶ୍ନ ଉଠାଇଛନ୍ତି ।

କୃଷ୍ଣଚନ୍ଦ୍ର ସଗରିଆଙ୍କ ଇସ୍ତଫା ଡ୍ରାମାର ପୋଲ୍ ଖୋଲି ଦେଇଛନ୍ତି କୁନ୍ଦୁଲି ପୀଡ଼ିତାଙ୍କ ପରିବାର ଏବଂ ଘଟଣାର ତଦନ୍ତ କରୁଥିବା କମିଶନଙ୍କ କାଉନସିଲ୍ । ଯଦି ପୀଡ଼ିତାଙ୍କୁ ନ୍ୟାୟ ଦେବାକୁ ଚାହୁଁଛନ୍ତି, ତାହେଲେ ପ୍ରଦୀପ ମାଝୀ ଏବଂ ବିଧାୟକ କୃଷ୍ଣଚନ୍ଦ୍ର ସଗରିଆ କମିଶନଙ୍କ ନିକଟରେ ସତ୍ୟପାଠ ଦାଖଲ କରିବାକୁ ସେମାନେ ଯୁକ୍ତ ବାଢ଼ିଛନ୍ତି । ସେପଟେ କୁନ୍ଦୁଲି ଘଟଣାର ତଦନ୍ତ କରୁଥିବା କମିଶନଙ୍କ ସ୍ବତନ୍ତ୍ର କାଉନସେଲ ପ୍ରଭାକର ପଟ୍ଟନାୟକ କହିଛନ୍ତି, ସତ୍ୟପାଠ ଦାଖଲ ପାଇଁ କୃଷ୍ଣ ସଗରିଆଙ୍କୁ ବାରମ୍ବାର ନୋଟିସ୍ ହୋଇଥିଲେ ମଧ୍ୟ ସେ ଦାଖଲ କରୁନାହାନ୍ତି ।

ତଦନ୍ତରେ ସହଯୋଗ ପାଇଁ ସତ୍ୟପାଠ ଦାଖଲ କରୁନାହାନ୍ତି, କିନ୍ତୁ ରାଜନୈତିକ ସ୍ବାର୍ଥ ସାଧନ ପାଇଁ କୁନ୍ଦୁଲି ପୀଡ଼ିତାଙ୍କ ନାଁ ନେଉଛନ୍ତି । ଧନ୍ୟ କହିବ ସଗରିଆଙ୍କୁ … ଧନ୍ୟ କହିବ ତାଙ୍କ ଡ୍ରାମାକୁ … ।

from News7 https://ift.tt/2RstGoO