ସାନ ପୁଅକୁ ମାରିଥିଲେ ବଡ଼ ପୁଅ ଓ ମାଆ, ୧୧ଦିନ ପରେ ଜଣାପଡିଲା ସତ…

ସୋର ୨୩।୦୨: ସାନ ପୁଅକୁ ମାରି ଘରେ ପୋତି ଦେଇଥିଲେ ମାଆ ଏବଂ ବଡ଼ ପୁଅ । ୧୧ଦିନ ପରେ ଜଣାପଡ଼ିଲା ଘଟଣା । ସାନ ଭାଇର ପିଣ୍ଡ ଶ୍ରାଦ୍ଧ କରି ବଡ଼ ଭାଇ ଫେରିବା ପରେ ସାମ୍ନାକୁ ଆସିଥିଲା ସତ । ବାଲେଶ୍ୱର ଜିଲ୍ଲା ସୋର ବାହାନଗା ଜାତୀୟ ରାଜପଥ ଇଚ୍ଛାପୁର ପୋଖରୀ ନିକଟରେ ଏହି ଅଭାବନୀୟ ଘଟଣା ଘଟିଛି।

୨୨ ବର୍ଷୀୟ ସାନ ପୁଅକୁ ମାରି ଘରେ ପୋତି ଦେଇଥିଲେ ଉଭୟ ମା ଏବଂ ବଡ଼ ପୁଅ । ଗତ ୧୨ ତାରିଖ ରାତି ୧୧ ଟାରେ ମଦ ପିଇ ସାନପୁଅ ଘରକୁ ଫେରିବା ପରେ, କୌଣସି କଥାକୁ ନେଇ ଉଭୟ ମାଆ ଏବଂ ପୁଅଙ୍କ ମଧ୍ୟରେ ବଚସା ହୋଇଥିଲା । ଏହା ଉଗ୍ରରୂପ ଧାରଣ କରିବା ପରେ ମାଆ ଶୁକୁରୀ ଜେନା ଏବଂ ବଡ଼ ପୁଅ ଜଗବନ୍ଧୁ ଜେନା ମଦ ପିଇ ସାନ ପୁଅ ବଳରାମ ଜେନାଙ୍କୁ ଶାବଳରେ ଆକ୍ରମଣ କରିଥିଲେ । ଫଳରେ ବଳରାମଙ୍କର ମୃତ୍ୟୁ ଘଟିଥିଲା । ଏହାପରେ ବଳରାମଙ୍କ ମୃତଦେହକୁ ଶୋଇବା ଘର ଭିତରେ ଗାତ ଖୋଳି ଲୁଣ ଦେଇ ପୋତି ଦେଇଥିଲେ । ସେତେବେଳେ ଏହି ଘଟଣା ସଂପର୍କରେ କାହାରିକୁ ଜଣାପଡ଼ିନଥିଲା । ଏବେ ଘଟଣା ଜଣାପଡ଼ିବା ପରେ ସୋର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ମାଆ ଏବଂ ବଡ଼ ପୁଅକୁ ଗିରଫ କରିଛି ।

from Prameya News7 https://ift.tt/2P6Z28B